治療治部落

治療治部落

2018年4月1日 星期日

一個自閉症媽媽嘅心聲/轉載

 beautymama2013

我個小朋友係有自閉傾向,但因為唔係嚴重自閉,就咁表面睇係睇唔到佢有咩唔同,但同佢相處傾計就會覺得佢同其他小朋友有分別。

因為唔係嚴重,所以仲喺讀緊主流學校,但今年覺得佢同其他小朋友嘅程度有咗差距,小朋友開始冇咁鍾意同佢玩(因為佢言語仲未表達得好好),肯追住佢玩嗰陣就係當佢係壞人傻瓜咁追住佢,有時其他小朋友會對佢郁手郁腳(但佢有時唔識同我講番,一還手人地個小朋友同媽咪投訴就鬧我個仔)。

作為媽媽,我好努力教佢表達多啲,因為再大啲我真係冇辦法跟住佢保護佢,我對佢品格行為要求都高,唔想因為自閉呢2個字令佢俾人標籤,希望佢就算唔得人鍾意都唔好俾人討厭,我都知唔可能滿足所有人,但尋日俾一個同學仔媽咪叫我個仔唔好跟住佢,唔好同佢個仔玩,我個心真係好難受,點解佢蝦我個仔就得,但我個仔想同佢玩就要俾佢話?尋晚忍唔住沖涼嗰陣呢埋喊。

有人可能覺得,小朋友要自己適應呢個「正常人」嘅世界,咩係正常?我覺得,貓同狗雖然都係動物,但大家特質唔同,將隻貓放落狗仔度,佢都只能變成一隻似貓嘅狗,佢永遠都會同其他人唔同,阿仔唔係有病,佢唔會變「正常」,只能令佢唔好睇落咁唔一樣。

(本文轉載自《親子王國》討論區 3/3/2018。)

沒有留言:

張貼留言